Allaskuvlla luohpadanlávdegoddi

Allaskuvlla luohpadanlávdegoddi geahččala áššiid mat gusket luohpadit ohppiid universiteahta-, allaskuvlla- dahje ámmátallaskuvlaoahpahusain. Áššit gieđahallojuvvojit luohpadanlávdegottis dušše dallego lea ilbman čálalaš almmuheapmi gullevaš oahppoásahusa rektoris dahje ámmátallaskuvlla jođihanjoavkkus.

Luohpadeami mearrádus mearkkaša ahte oahppi ii oaččo joatkit álggahuvvon oahpahusa dás ovddos. Dábálaččat ii oaččo oahppái láhčit ge saji iežá seammalágán allaskuvlaoahpahussii. Luohpadeami mearrádus sáhttá maid leat ággan caggat oahppi iežá allaskuvlaoahpahussii lehkos vaikko makkár.

Oahppi sáhttá luohpaduvvot allaskuvlaoahpahusas jos:

  • váivašuvvá psyhkalaš dávddas,
  • badjelmeari geavtá alkohola dahje narkotihka dahje
  • lea sivalaš bahás rihkkumiidda.

Dasa lassin gáibiduvvo

  • duođalaš ballu ahte oahpus sáhttá lášmmodahttit soapmása dahje árvosaš oami.

Psyhkalaš dávda ja boasttugeavahus

Jos lea ágga doaivut ahte berre studeantta luohpadit de sáhttá luohpadanlávdegoddi ávžžuhit studeantta čađahit doavttiriskosa.

Ii gávdno ovttageardánis ipmárdus doahpagis psyhkalaš váddu. Iešguđet psykiatikerat sáhttet dulkot doahpaga iešguđet láhkái. Sosiálastivrras lea ipmárdus ahte dat lea váddu psykologalaš ovdáneamis mii buktá váttuid persovnnalašdásis ja ráves olbmo láhttemis.

Bahás rihkkun

Bahás rihkkumat leat veahkaváldimat dahje roaves narkotihkarihkkumat, iežá sániiguin rihkkumat main dábálaččat lea fáŋgaráŋggáštus oanimusat jagi. Roaves bahádagut ja álbmotváralaš rihkkumat main lea oanimusat jagi fáŋgaráŋggáštus leat maid bahás rihkkumat. Studeanta gii lea sivalaš máŋggaid rihkkumiidda sáhttá maid luohpaduvvot jos su dagut ovttas addet fáŋgaráŋggáštusa mii lea oanimusat jagi.

Geahččalit rihkkuma dahkat ipmirduvvo leat seamma bahát go rihkkuma čađaheapmi.

Almmuheamis mearrideapmái

Ášši álggahuvvo maŋŋil almmuheami rektoris universiteahtas dahje allaskuvllas. Ášši sáhttá maid vuolgit das jos oahppi gii lea luohpaduvvon sihtá ođđasit geahččalit luohpadeami. Allaskuvlla luohpadanlávdegoddi sáhttá jos lea dárbu diktit studeantta čađahit doavttiriskosa dahje viežžat dieđuid rihkkunregistaris mii guoská sutnje allasii. Iežálágán dieđuid sáhttá maid sihtat, ovdamearkka dihte dieđuid dearvvašvuođa- ja skihpadivššus dahje sosiálabálvalusas.

Go luohpadanlávdegoddi lea mearridan luohpadit studeantta dahje mearridan duššadit dakkár mearrádusa de luohpadanlávdegoddi dieđiha sisaváldineiseválddiide geaidda mearrádus guoská ja maiddai Guovddáš oahppodoarjjalávdegoddái (Centrala studiestödsnämnden).

Luohpadanlávdegotti mearrádus sáhttá váidaluvvot almmolaš hálddašanduopmostullui sihke studeanttas ja guoskevaš universiteahtas dahje allaskuvllas.

Oktavuođat

Boastačujuhus

Allaskuvlla luohpadanlávdegoddi/Högskolans avskiljandenämnd
Boksa 7249
103 89 STOCKHOLMA
Ruoŧŧa

Guossástallančujuhus

Löjtnantsgatan 21, Stockholma

Tel 08-563 087 00
Fáksa 08-563 085 50
E-boasta han@han.se